ஜீன்ஸ் (Genes)

இது மருத்துவப் பதிவு என்றும் சொல்லலாம்; இல்லை என்றும் சொல்லலாம். 

மூன்று வருடங்களுக்கு முன்:

  

சூப்பர்மார்க்கெட்டில் அந்தச் சிறுவன் அம்மா கூடவே போய்க்கொண்டிருந்தான். நான்கு வயதுக்கேயுரிய துடிப்பும், ஆர்வமும் மேலிட அங்குமிங்கும் போகப் பார்த்தாலும் அம்மா விடவில்லை. கவனமாகக் கையைப் பிடித்து வைத்திருந்தாள். பாத்திரங்கள் பகுதியில் மும்முரமாக ஏதோ பார்த்துக்கொண்டிருந்தாள் அம்மா. ஹை, இதென்ன, இத்தனை கத்திகள்? பல சைஸ்கள், நிறங்கள், விதங்கள் - கண்கள் மின்னப் பார்த்தான் அவன். நைஸாக அம்மாவின்  கைப்பிடியை உருவி, ஒரு கத்தியை எடுத்துப் பார்த்தான்.

சிறிது நேரம் கழித்து, அம்மா மறுபடி அவன் கையைப் பிடிக்க முயல, அவன் கையைத் தரவில்லை. இரண்டு கையையும் பின்னால் கட்டி வைத்திருந்தான். அம்மா கையை வலிந்திழுக்க, கை வந்தது விரலில் இரத்தப் பிசுபிசுப்புடன்!! பதறிப்போய், “என்னடா செஞ்சே?” என்றதற்கு, “அது.. கத்தி வெட்டுமான்னு வெட்டிப் பாத்தேன்” என்றான் அவன்!!

எட்டு வருடங்களுக்கு முன்:

மாலைநேரம். அம்மா வீட்டில் டி.வி. பார்த்துக் கொண்டிருக்க, ஐந்து வயது மகன் வெளியே தெருவில் சைக்கிள் ஓட்டிகொண்டிருந்தான். சிறிது நேரத்தில் உள்ளே வந்தவன், பாத்ரூமுக்குப் போவதும், கிச்சனில் அலமாரியைத் திறப்பதுமாக இருந்தான். “டேய் என்ன தேடுற?” அம்மா கேட்டதற்கு, “ஒண்ணுமில்லைம்மா” என்றான். ஒண்ணுமில்லைன்னாலே விவகாரமாச்சே என்று அம்மா எழுந்து போகிறாள். வழியெங்கும் சொட்டுச்சொட்டாக இரத்தம்!! ”அடேய், என்னத்தடா செஞ்சே?” என்று இரைய, “ஒண்ணுல்லம்மா, ஒரு கண்ணாடித் துண்டு அங்க கிடந்துது; ஷார்ப்பா இருக்கான்னு பாத்தேன்!!!!” 

முப்பத்தைந்து வருடங்களுக்கு முன்:(அலுத்துக்காதீங்க, இதான் கடைசி!)

வீட்டுப் பின்புறம் உள்ள தோட்டத்திற்கு வந்தச் சிறுவன் கண்ணில் அது பட்டது!! அம்மா இளநீர் வெட்டிவிட்டுப் போட்டு வைத்திருந்த அரிவாள்!! நான் வெட்டுறேம்மான்னு எவ்வளவு கெஞ்சியும், ஆறு வயசுக்கே அருவா கேக்குதான்னு தரவேயில்லை அம்மா. சுற்றும் முற்றும் பார்த்து யாரும் இல்லை என்று உறுதி செய்துவிட்டு அதைக் கையில் எடுத்தான். 

அங்கே தேங்காய் எடுத்துப்போக வந்த அண்ணன் அவனைப் பார்த்துவிட்டு அலறினான், “ம்மா, இங்க பாரு இவன் கைப்பெருவிரல் அறுந்து தொங்குது!!”.

இப்ப ஈஸியா யூகிச்சிருப்பீங்க (கஷ்டப்பட்டுக் கண்டுபிடிக்க நான் என்ன கிரைம் ஸ்டோரியா எழுதிருக்கேன்?). மத்தவங்க “அப்பனுக்குப் புள்ள தப்பாம பொறந்துருக்கு”ங்கிற வழக்குச் சொல்லையும், தமிழ் தெரியாத பீட்டர்ஸ் “Like Father, Like Sons"ங்கிற சொலவடயையும் ஞாபகப்படுத்திக்கோங்க!! அரிவாள் வெட்டு அப்பாவோட அருமந்தப் பிள்ளைங்கதான் மத்த ரெண்டுபேரும்!!

	Tweet

Post Comment